apríl 2026

Á fimmtudaginn síðastliðinn, á sumardaginn fyrsta, fögnuðum við 40 ára afmæli okkar með hátíðlegum viðburði í Hafnarborg þar sem litið var yfir farinn veg, horft til framtíðar og þakkað fyrir það traust sem starfinu hefur verið sýnt í gegnum árin.

Viðburðurinn var vel sóttur og ríkti hlý og einlæg stemning. Björg Fenger stýrði dagskránni og opnaði viðburðinn með orðum um mikilvægi starfsins og þann mannlega kraft sem býr að baki.

Í ávörpum dagsins var bæði litið til fortíðar og framtíðar. Lárus Welding stjórnarformaður Krýsuvíkur fór yfir sögu samtakanna, minntist föðurs síns heitins Snorra Welding sem var einn af stofnendum Krýsuvíkur og minnti á þá elju og fórnfýsi þeirra sem hafa lagt grunninn að starfinu. Elías Guðmundsson forstöðumaður Krýsuvíkur fjallaði um þróun meðferðarinnar og þær breytingar sem hafa átt sér stað á síðustu árum, með aukinni áherslu á fagmennsku, áfallameðferð og heildræna nálgun.

Bæjarstjóri Hafnarfjarðar lagði áherslu á mikilvægi starfseminnar fyrir samfélagið og lýsti yfir áframhaldandi vilja til samstarfs við Krýsuvík. Anna Hildur Guðmundsdóttir kom inn á stöðu meðferðarmála á Íslandi og mikilvægi samvinnu milli aðila í kerfinu. Í ræðu sinni tilkynnti hún einnig um sex mánaða tilraunaverkefni í samstarfi við heilbrigðisráðuneytið sem tryggir skjólstæðingum Krýsuvíkur og Hlaðgerðarkots flýti innlögn inn á Vog. Um er að ræða tímamótasamning í íslensku meðferðarkerfi sem miðar að því að tryggja að veikasta fólkið í kerfinu komist í afeitrun, sem er forsenda þess að geta hafið meðferð í Krýsuvík. Þetta markar mikilvægt skref í átt að heildstæðari þjónustu og betri samfellu í bataferlinu.

Eitt af eftirminnilegustu augnablikum dagsins var þegar sýnd var stikla úr heimildarþætti um Krýsuvík eftir Þorstein J en hún var  sýnd í heild sinni á RÚV það sama kvöld. Tolli færði einnig Krýsuvík stórt málverk í afmælisgjöf en verkið stendur sem tákn um ferðalag hetjunnar og þeirri umbreytingu, styrk og von sem starfsemin byggir á. Tónlist skipaði einnig mikilvægan sess í dagskránni með Krumma og Pétri Ben.

Við þökkum öllum sem fögnuðu með okkur, og öllum þeim sem hafa verið hluti af þessari vegferð.

Ljósmyndir: Hallur Karlsson

Nú á þessu tímamótum fagnar Krýsuvík 40 ára starfi, og af því tilefni höfum við gefið út afmælisrit sem varpar ljósi á ferðalagið, fólkið og þróunina sem hefur mótað starfsemina í gegnum árin.

Ritið er bæði afturhvarf og sýn fram á við. Þar má finna sögu stofnunarinnar og þeirra sem lögðu grunninn að starfinu, en líka innsýn í það sem hefur verið að þróast á síðustu árum; faglegri meðferð, aukna áherslu á áfallavinnu, nýja kvennaálmu og dýpri skilning á því hvað raunverulegur bati krefst.

Viðtöl við lykilfólk í starfinu gefa lifandi mynd af daglegu starfi í Krýsuvík, frá meðferðarteyminu og ráðgjöfum til þeirra sem skapa rammann í kringum meðferðina. Þar má líka lesa um samstarf við alþjóðlega aðila eins og High Watch, sem hefur haft mikil áhrif á þróun meðferðarinnar.

Kannski það sem snertir mest eru þó batasögurnar sjálfar. Frásagnir þeirra sem hafa gengið í gegnum meðferðina, staðið frammi fyrir sjálfum sér og fundið leið til baka. Þær minna okkur á að bati er ekki einföld lína heldur ferli, stundum brotakennt, en alltaf mögulegt.

Afmælisritið er okkar leið til að staldra við, horfa yfir farinn veg og þakka fyrir það traust sem okkur hefur verið sýnt í gegnum árin. En líka til að deila því með fleirum hvað felst í starfinu og hvers vegna það skiptir máli.

Ritinu verður dreift í prentuðu formi á helstu stofnanir

Smellið til að lesa rafrænu útgáfuna: afmælisrit

Sérstakar þakkir fá:  Dagný B.Gísladóttir ritstjóri ritsins, Aþena Elíasdóttur grafískur hönnuður, Helgi Magnússon prófarkalesari, kærar þakkir til allra þeirra sem skrifuðu í ritið og til viðmælenda,  til þeirra ljósmyndara sem leyfðu birtingu á myndefni, til Ölgerðarinnar og til allra annarra styrktaraðila verkefnisins (sjá á lokasíðum ritsins)

Hér má einnig sjá nokkrar opnur úr ritinu: