elias

FUNDARBOÐ

Aðalfundir og fulltrúaráðsfundir Krýsuvíkursamtakanna, kt. 610486-1699, og
Meðferðarheimilisins Krýsuvík, kt. 560991-1189, verða haldnir sameiginlega klukkan
17:00 þann 21. maí 2026 í fundarsalnum Sveinatungu í Ráðhúsi Garðabæjar,
Garðatorgi 7, 210 Garðabæ.

Á dagskrá fundanna verða eftirfarandi mál:
1. Kosning fundarstjóra og fundarritara
2. Sameiginleg skýrsla stjórna um starfsemi félaganna árið 2025 lögð fram
3. Ársreikningar félaganna fyrir árið 2025 lagðir fram til samþykktar
4. Kosningar fulltrúaráðsmanna í fulltrúaráð og kosning formanns fulltrúaráðs
5. Kjör aðalmanna og varamanna í stjórn og kjör stjórnarformanns
6. Kosningar endurskoðenda
7. Önnur mál

Tillögur frá félagsmönnum sem bera á upp á aðalfundi skulu vera komnar í hendur
stjórnanna eigi síðar en fimm dögum fyrir aðalfund. Dagskrá og ársreikningar
félaganna munu liggja frammi á skrifstofu félaganna félagsmönnum til sýnis fimm
dögum fyrir aðalfund. Samhliða aðalfundi er haldinn fulltrúaráðsfundur og því verður
ein sameiginleg fundargerð útbúin fyrir fundina.
Fundarboð þetta er sent skráðum félagsmönnum í Krýsuvíkursamtökunum og
Meðferðarheimilinu Krýsuvík ásamt því að vera birt opinberlega á heimasíðu
félaganna og í einu víðlesnu dagblaði með minnst tveggja vikna fyrirvara.
Félagsmenn geta nálgast fundargögn rafrænt viku fyrir aðalfund, með því að senda
fyrirspurn á elli@krysuvik.is. Fundargögnin verða einnig afhent á aðalfundinum.

Hafnarfjörður, 7. maí 2026,

Stjórn Krýsuvíkursamtakanna og Meðferðarheimilisins Krýsuvík.

Á fimmtudaginn síðastliðinn, á sumardaginn fyrsta, fögnuðum við 40 ára afmæli okkar með hátíðlegum viðburði í Hafnarborg þar sem litið var yfir farinn veg, horft til framtíðar og þakkað fyrir það traust sem starfinu hefur verið sýnt í gegnum árin.

Viðburðurinn var vel sóttur og ríkti hlý og einlæg stemning. Björg Fenger stýrði dagskránni og opnaði viðburðinn með orðum um mikilvægi starfsins og þann mannlega kraft sem býr að baki.

Í ávörpum dagsins var bæði litið til fortíðar og framtíðar. Lárus Welding stjórnarformaður Krýsuvíkur fór yfir sögu samtakanna, minntist föðurs síns heitins Snorra Welding sem var einn af stofnendum Krýsuvíkur og minnti á þá elju og fórnfýsi þeirra sem hafa lagt grunninn að starfinu. Elías Guðmundsson forstöðumaður Krýsuvíkur fjallaði um þróun meðferðarinnar og þær breytingar sem hafa átt sér stað á síðustu árum, með aukinni áherslu á fagmennsku, áfallameðferð og heildræna nálgun.

Bæjarstjóri Hafnarfjarðar lagði áherslu á mikilvægi starfseminnar fyrir samfélagið og lýsti yfir áframhaldandi vilja til samstarfs við Krýsuvík. Anna Hildur Guðmundsdóttir kom inn á stöðu meðferðarmála á Íslandi og mikilvægi samvinnu milli aðila í kerfinu. Í ræðu sinni tilkynnti hún einnig um sex mánaða tilraunaverkefni í samstarfi við heilbrigðisráðuneytið sem tryggir skjólstæðingum Krýsuvíkur og Hlaðgerðarkots flýti innlögn inn á Vog. Um er að ræða tímamótasamning í íslensku meðferðarkerfi sem miðar að því að tryggja að veikasta fólkið í kerfinu komist í afeitrun, sem er forsenda þess að geta hafið meðferð í Krýsuvík. Þetta markar mikilvægt skref í átt að heildstæðari þjónustu og betri samfellu í bataferlinu.

Eitt af eftirminnilegustu augnablikum dagsins var þegar sýnd var stikla úr heimildarþætti um Krýsuvík eftir Þorstein J en hún var  sýnd í heild sinni á RÚV það sama kvöld. Tolli færði einnig Krýsuvík stórt málverk í afmælisgjöf en verkið stendur sem tákn um ferðalag hetjunnar og þeirri umbreytingu, styrk og von sem starfsemin byggir á. Tónlist skipaði einnig mikilvægan sess í dagskránni með Krumma og Pétri Ben.

Við þökkum öllum sem fögnuðu með okkur, og öllum þeim sem hafa verið hluti af þessari vegferð.

Ljósmyndir: Hallur Karlsson

Nú á þessu tímamótum fagnar Krýsuvík 40 ára starfi, og af því tilefni höfum við gefið út afmælisrit sem varpar ljósi á ferðalagið, fólkið og þróunina sem hefur mótað starfsemina í gegnum árin.

Ritið er bæði afturhvarf og sýn fram á við. Þar má finna sögu stofnunarinnar og þeirra sem lögðu grunninn að starfinu, en líka innsýn í það sem hefur verið að þróast á síðustu árum; faglegri meðferð, aukna áherslu á áfallavinnu, nýja kvennaálmu og dýpri skilning á því hvað raunverulegur bati krefst.

Viðtöl við lykilfólk í starfinu gefa lifandi mynd af daglegu starfi í Krýsuvík, frá meðferðarteyminu og ráðgjöfum til þeirra sem skapa rammann í kringum meðferðina. Þar má líka lesa um samstarf við alþjóðlega aðila eins og High Watch, sem hefur haft mikil áhrif á þróun meðferðarinnar.

Kannski það sem snertir mest eru þó batasögurnar sjálfar. Frásagnir þeirra sem hafa gengið í gegnum meðferðina, staðið frammi fyrir sjálfum sér og fundið leið til baka. Þær minna okkur á að bati er ekki einföld lína heldur ferli, stundum brotakennt, en alltaf mögulegt.

Afmælisritið er okkar leið til að staldra við, horfa yfir farinn veg og þakka fyrir það traust sem okkur hefur verið sýnt í gegnum árin. En líka til að deila því með fleirum hvað felst í starfinu og hvers vegna það skiptir máli.

Ritinu verður dreift í prentuðu formi á helstu stofnanir

Smellið til að lesa rafrænu útgáfuna: afmælisrit

Sérstakar þakkir fá:  Dagný B.Gísladóttir ritstjóri ritsins, Aþena Elíasdóttur grafískur hönnuður, Helgi Magnússon prófarkalesari, kærar þakkir til allra þeirra sem skrifuðu í ritið og til viðmælenda,  til þeirra ljósmyndara sem leyfðu birtingu á myndefni, til Ölgerðarinnar og til allra annarra styrktaraðila verkefnisins (sjá á lokasíðum ritsins)

Hér má einnig sjá nokkrar opnur úr ritinu:

Svölurnar, góðgerðarfélag flugfreyja og flugþjóna, komu í heimsókn til okkar í Krýsuvík og færðu meðferðinni rausnarlegan styrk upp á eina milljón króna. Styrkurinn mun nýtast afar vel í starfsemi heimilisins og styðja við áframhaldandi uppbyggingu og þjónustu við skjólstæðinga. Við erum Svölunum innilega þakklát fyrir hlýhuginn og dýrmætt framlag til samfélagsins.

Krýsuvíkursamtökin standa að fjáröflun dagana 5.–12. Febrúar 2026 og við vonum að sem flestir taki þátt með því að gefa og dreifa henni sem víðast.
Fjáröflunin ber heitið Edrú vikan undir slagorðinu „Drekkum minna – gefum meira“.

Í Edrú vikunni verða landsmenn hvattir til að sleppa áfengi og gefa í staðinn andvirðið til Krýsuvíkur.

Sem stendur eru um 120 einstaklingar á biðlista eftir bráðri og lífsnauðsynlegri meðferð í Krýsuvík,
flestir þeirra ungt fólk í miklum vanda. Það er nauðsynlegt að stytta þessa biðlista, nokkuð sem krefst
aukins fjármagns og víðtækari þjónustu. Með fyrirhugaðri opnun áfangaheimilis getum við tekið á
móti 41 einstaklingi samtímis í stað 29, sem mun stytta biðlistana verulega og bjarga mannslífum.

Krýsuvík hefur starfað í yfir 40 ár. Undanfarin ár hefur verið unnið markvisst að eflingu starfsins með
betur menntuðum ráðgjöfum og samstarfi við fremstu meðferðarstöðvar í Bandaríkjunum. Árangurinn
er skýr: um 70% þeirra sem ljúka sex mánaða meðferð eru edrú tveimur árum síðar og snúa aftur
út í samfélagið, til náms eða starfa.

Þátttaka er einföld og boðið verður upp á tvo möguleika:

Hringja í 9027107 þar sem 4.500 kr er dregin af símareikningi

eða greiða í gegnum www.edruvika.is þar sem þrír möguleikar eru í boði;
andvirði rauðvínsflösku kr. 3.500,
andvirði 12 bjóra kr. 4.500
og
andvirði sterks víns kr. 7.500.

Sex starfsmenn frá Krýsuvík fóru núna í janúar í heimsókn á meðferðarstöðina Highwatch í Bandaríkjunum, þar sem þau sóttu IFS Level 1 námskeið (Internal Family Systems).

IFS er gangreynd og vaxandi meðferðarnálgun sem byggir á þeirri hugmynd að innra líf okkar samanstandi af ólíkum „pörtum“  tilfinningum og viðbrögðum. Partarnir hafa allir sitt hlutverk og tilgang. Í stað þess að bæla niður eða berjast við erfiða parta er með IFS unnið með þá af forvitni og virðingu. Markmiðið er að styrkja tengsl við sjálfið (e. Self), sem er rólegur og skýr kjarni hvers einstaklings.

Nálgunin hentar mjög vel í áfalla- og fíknimeðferð þar sem hún styður einstaklinga í að skilja eigin innri ferla, auka sjálfsvitund og byggja upp öryggi og sjálfstraust. Þekkingin sem starfsmenn Krýsuvíkur fengu á þessu námskeiði mun nýtast bæði í klínísku starfi og í daglegum samskiptum innan Krýsuvíkur.

Krýsuvík leggur ríka áherslu á símenntun og faglega þróun starfsfólks, með það að markmiði að veita skjólstæðingum sem heildstæðasta og áhrifaríkasta stuðning sem völ er á.

Það var okkur sönn ánægja og heiður að taka á móti Höllu Tómasdóttur, forseta Íslands, á Krýsuvík í morgun. Halla kynnti sér starfsemina, tók þátt í samtölum með starfsfólki og stjórn og fékk innsýn í þá daglegu vinnu sem fer fram hér á Krýsuvík.

Við kynntum henni helstu baráttumál okkar, meðal annars mikilvægi þess að stytta biðlista og tryggja aðgengi að úrræðum fyrir þá sem þurfa á þeim að halda. Einnig ræddum við önnur brýn mál sem tengjast þjónustu okkar og framtíðarsýn.

Við áttum virkilega gott og opið samtal um málaflokkinn í heild sinni, áskoranirnar sem við stöndum frammi fyrir og hvaða næstu skref gætu fært nálina áfram. Það var hvetjandi að finna áhuga forsetans og viljann til að hlusta á reynslu okkar og sjónarmið.

Við erum þakklát fyrir heimsóknina og lítum á hana sem mikilvægt skref í áframhaldandi samtali um hvernig við sem samfélag getum byggt upp betri stuðning við fólk í bataferli.

Nú erum við hjá Krýsuvík búin að vera að undirbúa jólin og héldum í gær litlu jólin fyrir skjólstæðinga, starfsfólk, stjórn og fyrrum Krýsvíkinga. Solla og Sigga í eldhúsinu og þeirra teymi elduðu frábæran veislumat sem kom öllum í mikið jólaskap.

Það var þá æsispennandi keppni um best skreytta grúbbuherbergið og var mikið lagt í það – sjá myndir.

Engin annar en Kristmundur Axel kom svo og söng nokkur lög með sinni einskærru snilld og kom öllum í gott skap. Óvæntur jólasveinn mætti svo og gaf öllum á Krýsuvík jólapakka.

Vel heppnaður dagur í alla staði!

Starfsfólk Krýsuvíkur óskar ykkur gleðilegra jóla og farsældar á komandi ári!

Nú er komið að árlega Reykjavíkurmaraþoni Íslandsbanka og við erum með öflugan hlaupahóp, leiddan af engri annarri en MARI JÄRSK, uppá Krýsuvík til að undirbúa starfsfólk og skjólstæðinga fyrir hlaupið!

HLAUPTU FYRIR OKKUR

Þú getur lagt þitt á plóg, tekið þátt og hlaupið fyrir Krýsuvík! 
Með því að skrá þig til að hlaupa fyrir Krýsuvík ertu ekki aðeins að taka þátt í frábærum viðburði, heldur ert þú líka að styðja mikilvægt starf sem skiptir máli fyrir allt samfélagið.

Svona tekur þú þátt:

1. Skráðu þig í Reykjavíkurmaraþonið.

2. Veldu Krýsuvík sem þín góðgerðarsamtök.

3. Safnaðu áheitum og hvettu vini & fjölskyldu til að leggja sitt af mörkum.

 Skráðu þig í dag í hlaupið: corsa.is/is/reykjavikur-marathon

Við verðum með aðsetur á Laundromat Cafe í Austurstræti, þar sem þeir sem hlaupa fyrir okkur geta sótt sér hlaupabol áður en gengið er til leiks.

Heit á hlauparana okkar!

Ef þú kemst ekki í hlaupið (eða ert ekki til í að hlaupa:) en vilt styðja málefnið,  farðu inn á rmi.is til að heita á þá sem hlaupa fyrir Krýsuvík!

Hvert framlag skiptir máli 🫶